തിരുവനന്തപുരം > പീഡനകേസില്‍ എല്‍ദോസ് കുന്നപ്പിള്ളി അന്വേഷണവുമായി സഹകരിക്കണമെന്ന് ഹൈക്കോടതി. എല്ലാദിവസവും രാവിലെ ഒമ്പതുമണിക്ക് അന്വേഷണ ഉദ്യോഗസ്ഥന്‍ മുമ്പാകെ ഹാജരാകണമെന്ന് കോടതി പറഞ്ഞു. മുന്‍കൂര്‍ ജാമ്യം റദ്ദാക്കണമെന്ന ഹര്‍ജി അടുത്ത ചൊവ്വാഴ്‌ച പരിഗണിക്കും.
കാഞ്ഞങ്ങാട് : പുതുക്കൈ പ്രദേശത്തോടുള്ള കാഞ്ഞങ്ങാട് നഗരസഭയുടെ അവഗണനക്കെതിരെ ഇന്ത്യൻ നാഷണൽ കോൺഗ്രസ് പുതുക്കൈ മേഖല കമ്മിറ്റി നഗരസഭ മാർച്ച് നടത്തി. കാഞ്ഞങ്ങാട് മുൻസിപ്പാലിറ്റിയുടെ കിഴക്കൻ പ്രദേശങ്ങളായ പുതുകൈ, ഉപ്പിലികൈ, വാഴുനോറടി തുടങ്ങിയ പ്രദേശങ്ങളോടുള്ള അവഗണനക്കെതിരെയാണ് പ്രതിഷേധ മാർച്ച് നടത്തിയത്. നാലു കോടി ചിലവഴിച്ചു നിർമ്മിച്ച കുടിവെള്ള പദ്ധതി ഇപ്പോഴും പ്രവർത്തനക്ഷമമല്ല, റോഡുകൾ മുഴുവൻ പൊട്ടി പൊളിഞ്ഞിരിക്കുന്നു, സ്ട്രീറ്റ് ലൈറ്റ് തെളിയുന്നില്ല, പൊതു ശ്മശാനങ്ങൾ ഇല്ലാത്തത് അടക്കമുള്ള നിരവധി പ്രശ്നങ്ങൾ ഉന്നയിച്ചു കൊണ്ടാണ് നഗരസഭയിലേക്ക് മാർച്ച് നടത്തിയത്. മാർച്ച് ഡിസിസി പ്രസിഡന്റ് പി കെ ഫൈസൽ ഉത്ഘാടനം ചെയ്തു. ഡോ കെ വി ഗംഗാധരൻ അധ്യക്‌ഷനായി, പി വി സുരേഷ് അനിൽ വാഴുനോറടി, കെ പി ബാലകൃഷ്ണൻ, കെ കെ ബാബു,ഷിബിൻ ഉപ്പിലികൈ, രാധാകൃഷ്ണൻ മണിയാണി, സുരേഷ് ബാബു, സുജിത് പുതുകൈ, കെ കെ അലാമി, മനോജ് ഉപ്പിലികൈ, കുഞ്ഞികോമൻ, ചന്ദ്രശേഖൻ മേനിക്കാട്ട്, പത്മനാഭൻ മണ്ഡലം ,കുഞ്ഞി കൃഷ്ണൻ, രാജൻ തേക്കേകര, പ്രശാന്ത്, കെ കുഞ്ഞികൃഷ്ണൻ തുടങ്ങിയവർ സംസാരിച്ചു
കാഞ്ഞങ്ങാട്: ക്ഷേത്രആചാരങ്ങളും പാരമ്പര്യങ്ങളും സംരക്ഷിക്കുന്നതിന് വേണ്ടി ജീവിതം തന്നെ ഉഴിഞ്ഞ് വെക്കേണ്ടി വരുന്ന ക്ഷേത്രആചാര സ്ഥാനികർക്കു കിട്ടേണ്ട സർക്കാർ ആനുകൂലങ്ങളും പ്രതിമാസ വേതനങ്ങളും എത്രയും പെട്ടെന്ന് വിതരണം ചെയ്യുകയും പ്രതിമാസ വേതനം വർദ്ധിപ്പിക്കുന്നതിനും പുതിയതായി നിയോഗിച്ച ക്ഷേത്രേശ്വരൻമാരെ പ്രതിമാസ വേതന ആനുകൂല്യലിസ്റ്റിൽ ഉൾപ്പെടുത്തുക തുടങ്ങിയ ആവശ്യങ്ങൾ ഉന്നയിച്ച് കൊണ്ട് മുഖാരി / മുവാരി സമുദായ സംഘം നീലേശ്വരം ദേവസ്വം ബോർഡ് ഡിവിഷൻ ഓഫീസിന് മുന്നിൽ 7.11.2022 തിങ്കളാഴ്ച രാവിലെ 10 മണിക്ക് ധർണ്ണ സമരം സംഘടിപ്പിക്കുന്നു. ധർണ്ണ സമരം ഉൽഘാടനം ചെയ്യുന്നത് സമുദായത്തിൻ്റെസംസ്ഥാന അദ്ധ്യക്ഷൻ ശ്രീ കൺമണി രാധാകൃഷ്ണൻ, എക്കാൽ കുഞ്ഞിരാമൻ അദ്ധ്യക്ഷത വഹിക്കും.
പൊതുമേഖല സ്ഥാപനങ്ങളിൽ പെൻഷൻ പ്രായം 60 ആക്കി ഏകീകരിച്ചു കൊണ്ട് ധനവകുപ്പ് ഇറക്കിയ ഉത്തരവ് പിൻവലിക്കണമെന്ന് ഡിവൈഎഫ്ഐ സംസ്ഥാന സെകട്ടറിയേറ്റ് സർക്കാറിനോട് ആവശ്യപ്പെട്ടു.
122 പൊതുമേഖലാ സ്ഥാപനങ്ങളിൽ കെഎസ്ഇബി, കെഎസ്ആർടിസി, വാട്ടർ അതോറിറ്റി എന്നീ സ്ഥാപനങ്ങളിൽ ഒഴികെ പുതിയ ഉത്തരവ് ബാധക മാവുകയാണ്.
ഒരു ലക്ഷത്തിൽ കൂടുതൽ ജീവനക്കാർക്ക് ബാധകമാകുന്ന ഈ ഉത്തരവ് തൊഴിലന്വേഷകരായ ലക്ഷക്കണക്കിന് ഉദ്യോഗാർത്ഥികളെ പ്രതികൂലമായി ബാധിക്കുന്നതാണ്.
ദോത്തി ചലഞ്ചിൽ അതിശയിപ്പിക്കുന്ന ഫണ്ട്‌ പിരിവുമായി യൂത്ത് ലീഗ് ഒക്ടോബർ 10മുതൽ 30വരെ പ്രത്യേക മൊബൈൽ ആപ്പ് വഴി നടത്തിയ ദോത്തി വില്പനയിലൂടെയാണ് 16കോടി14ലക്ഷത്തിൽ അധികം വരുമാനം കണ്ടെത്തിയത്. മലപ്പുറം ജില്ലയിൽ മാത്രം ഏഴു കോടി എഴുപത്തിഒമ്പത് ലക്ഷം രൂപയുടെ ചലഞ്ച് നടത്തി, കോഴിക്കോട് മൂന്ന് കോടിയിലധികവും കണ്ണൂർ ഒരു കോടിയിലധികം രൂപയുടെയും ചലഞ്ച് നടത്തി.
കാസറഗോഡ് 91ലക്ഷം രൂപയുടെ സംഭാവനയാണ് ദോത്തി ചലഞ്ചിലുടെ ലഭിച്ചത്. മുസ്ലിം ലീഗ് സംസ്ഥാന പ്രസിഡണ്ട്‌ സയ്യിദ് സാദിഖ് അലി ശിഹാബ് തങ്ങൾ, യൂത്ത് ലീഗ് നേതാക്കളായ മുനവർ അലി ശിഹാബ് തങ്ങൾ, പി കെ ഫിറോസ് തുടങ്ങിയവർ സംസാരിച്ചു
കാഞ്ഞങ്ങാട്:കര്‍ഷകരോട് നീതി പുലര്‍ത്താന്‍ പിണറായി വിജയന്‍ തയ്യാറാവണം. കേരളത്തിലെ പ്രശ്നങ്ങളെ കണ്ടില്ലെന്ന് നടിച്ച് വിദേശത്ത് വിനോദയാത്ര ചെയ്യാനാണ് മുഖ്യമന്ത്രിക്ക് താല്പര്യമെന്ന് സമരം ഉദ്ഘാടനം ചെയ്ത് ബി.ജെ.പി ജില്ലാ ജന.സെക്രട്ടറി എ വേലായുധന്‍ പറഞ്ഞു
കര്‍ഷക മോര്‍ച്ച കാഞ്ഞങ്ങാട് മണ്ഡലം പ്രസിഡന്റ് ഗംഗാധരന്‍ ആനന്ദാശ്രമം അദ്ധ്യക്ഷത വഹിച്ചു.
സമരത്തില്‍ ബി.ജെ.പി ജില്ലാ വൈസ് പ്രസിഡന്റ് എം ബല്‍രാജ്, കാഞ്ഞങ്ങാട് മണ്ഡലം പ്രസിഡന്റ് പ്രശാന്ത് സൗത്ത്, മണ്ഡലം സെക്രട്ടറിമാരായ ഉണ്ണികൃഷ്ണന്‍ നെല്ലിക്കാട്ട്, മനോജ് പി, ജില്ലാ കമ്മിറ്റി അംഗങ്ങളായ രവീന്ദ്രന്‍ മാവുങ്കാല്‍, കുസുമ ഹെഗ്ഡെ, ഒ.ബി.സി മോര്‍ച്ച മണ്ഡലം പ്രസിഡന്റ് മധു എം വി, ബി.ജെ.പി മണ്ഡലം വൈ.പ്രസിഡന്റ് വീണാ ദാമോധരന്‍, മണ്ഡലം ട്രഷറർ എം.ഗോപാലൻ കല്ല്യാൺ റോഡ് തുടങ്ങിയവര്‍ സംസാരിച്ചു. കര്‍ഷക മോര്‍ച്ച മണ്ഡലം ജന.സെക്രട്ടറി രാജീവന്‍ കല്ല്യാണ്‍റോഡ് സ്വാഗതവും ഹരി നന്ദിയും പറഞ്ഞു.
*ഈസ്റ്റ് എളേരി സ. സഹ. ബാങ്ക് തിരഞ്ഞെടുപ്പ് 12ന്:*
*കോൺഗ്രസ് – ഡി.ഡി.എഫ് ധാരണയായി*
*ഡി.ഡി.എഫിന് 4 സീറ്റ്*
ചിറ്റാരിക്കാൽ :നവം 12 ന് നടക്കുന്ന ഈസ്റ്റ് എളേരി സർവീസ് സഹകരണ ബാങ്ക് തിരഞ്ഞെടുപ്പിൽ യു.ഡി.എഫ് -ഡി.ഡി.എഫ് ധാരണ
ഇന്നലെ വൈകിട്ട് ചിറ്റാരിക്കാലിൽ നടന്ന അവസാന റൗണ്ട് മാരത്തൺ ചർച്ചകളിൽ സമവായം രൂപപ്പെട്ടതായി യു.ഡി.എഫ് – ഡി ഡി.എഫ് നേതൃകേന്ദ്രങ്ങൾ അറിയിച്ചു.
മൊത്തമുള്ള 13 സീറ്റിൽ നിലവിൽ യു.ഡി.എഫിനും ഡി.ഡി.എഫിനും ഓരോ സീറ്റ് എതിരില്ലാതെ ലഭിച്ചിട്ടുണ്ട്
ബാക്കിയുള്ള 11 സീറ്റിലേക്കാണ് മൽസരം
ഇതിൽ 7 സീറ്റിൽ കോൺഗ്രസും 3 സീറ്റിൽ ഡി ഡി.എഫും ഒരു സീറ്റിൽ മുസ്ലീം ലീഗും മൽസരിക്കും
അഡ്വ. കെ.എ. ജോയി പ്രസിഡണ്ടായിട്ടുള്ള യു.ഡി. എഫ് മുന്നണിയാണ് ബാങ്ക് ഭരണം കയ്യാളുന്നത്.
കഴിഞ്ഞ തിരഞ്ഞെടുപ്പിൽ പ്രതിപക്ഷത്തായിരുന്ന ഡി.ഡി.എഫ് മുന്നണിയിലേക്ക് വരുന്നതോടെ യു.ഡി.എഫ് അനായാസ വിജയം ഉറപ്പിച്ചിരിക്കുകയാണ്
എങ്കിലും സമുന്നതരായ നേതാക്കളെ രംഗത്തിറക്കി പടയ്ക്കൊരുങ്ങുകയാണ്
സി.പി.എം നേതൃത്വവും.
കാഞ്ഞങ്ങാട് : ബേക്കൽ ഉപജില്ലാ കലോൽസവത്തിനെത്തുന്ന പ്രതിഭകൾക്കും ഒഫീഷ്യൽസിനും ഭക്ഷണമൊരുക്കാൻ കലവറ നിറച്ചു.
അജാനൂർ പഞ്ചായത്തിലെ 23 വാർഡുകളിലെയും കുടുംബശ്രീ യൂണിറ്റുകൾ ഒത്തൊരുമിച്ചാണ് നാട്ടുകാരുടെ സഹകരണത്തോടെ കലവറയിലേക്കുള്ള അരി, പച്ചക്കറികൾ, തേങ്ങ, പല വ്യഞ്ജനങ്ങൾ എന്നിവയെത്തിച്ചത്. കിഴക്കുംകര മുച്ചിലോട്ട് ജിഎൽപി സ്‌കൂൾ കേന്ദ്രീകരിച്ച് വാദ്യമേളങ്ങളുടെ അകമ്പടിയോടെയെത്തിയ കലവറഘോഷയാത്രയ്ക്ക് സംഘാടക സമിതിയും ഭക്ഷണ കമ്മിറ്റിയും സ്വീകരണം നൽകി. കലോൽസവം നടക്കുന്ന 1, 3, 4, 5 തീയതികളിൽ പായസം ഉൾപ്പെടെയുള്ള സദ്യ നൽകും. ദിവസവും മൂവായിരത്തിലധികം പേർക്കാണിത്. കലാപ്രതിഭകൾക്ക് രാവിലെ 2 നേരവും വൈകിട്ടും ചായയും പലഹാരവും നൽകും. സമാപന ദിവസമായ 5 ന് നാട്ടുകാർക്കും സദ്യയുണ്ട്. ദൂരസ്ഥലങ്ങളിലെത്തേണ്ട വിദ്യാർഥികൾക്ക് രാത്രി ഭക്ഷണവുമൊരുക്കും. ദിവസവും 60 ൽ അധികം കുടുംബശ്രീ പ്രവർത്തകർ, റെഡ്ക്രോസ്, ഗൈഡ്സ് കെഡറ്റുകൾ, വൊളൻ്റിയർമാർഎന്നിവർ ഭക്ഷണ ശാലയിൽ സേവനം നൽകും. എം.ദാമോദരൻ ചെയർമാനും എം.ബാബു കൺവീനറുമായ ഫുഡ് കമ്മിറ്റിയാണ് നേതൃത്വം നൽകുന്നത്
കലോൽസവ നഗരിയിൽ ലഹരിക്കെതിരെ രഹസ്യ സ്‌ക്വാഡ് . വെള്ളിക്കോത്തെ ബേക്കൽ ഉപജില്ലാ കലോൽസവ നഗരിയിൽ ലഹരിക്കെതിരെ രഹസ്യ സ്‌ക്വാഡ് പ്രവർത്തിക്കും.
ഹൊസ്ദുർഗ് പൊലീസിന്റെ നിയന്ത്രണത്തിൽ 2 സ്‌ക്വാഡുകളാണ് പ്രവർത്തിക്കുക. മഹാകവി പി സ്മാരക ഗവ. വൊക്കേഷണൽ ഹയർസെക്കൻഡറി സ്കൂളിൽ ചേർന്ന ലഹരി വിരുദ്ധ ക്ലബ് യോഗമാണ് ഈ തീരുമാനമെടുത്തത്. കലോൽസവ നഗരിയിലും ലഹരി ഉപയോഗവും വിപണനവും കർശനമായി തടയുകയാണ് ലക്ഷ്യം. പൊലീസിന്റെയും നാട്ടുകാരുടെയും സഹായത്തോടെ കലോൽസവ സമയങ്ങളിൽ വിവിധ വേദികളിലും സമീപങ്ങളിലും ചെറു ഗ്രൂപ്പുകളായി തിരിഞ്ഞു നിരീക്ഷണം ശക്തമാക്കും. സംശയാസ്പദമായി എന്തെങ്കിലും കണ്ടാൽ ഉടൻ ബന്ധപ്പെട്ട അധികൃതർക്കു വിവരം കൈമാറി നടപടിയെടുക്കും. വിപുലമായ ലഹരിവിരുദ്ധ കമ്മിറ്റിയും സംഘാടക സമിതിയുടെ ഭാഗമായി തിങ്കളാഴ്ച രാവിലെ 10ന് സ്‌കൂളിനു സമീപം മനുഷ്യചങ്ങലയുമൊരുക്കി.
കാഞ്ഞങ്ങാട് : ബേക്കൽ ഉപജില്ലാ സ്‌കൂൾ കലോൽസവം 1 മുതൽ 5 വരെ വെള്ളിക്കോത്ത് മഹാകവി പി സ്മാരക ജിവിഎച്ച്എസ്എസിൽ നടക്കും. ആദ്യദിനം
9.30 നു വിവിധ വേദികളിലായി സ്റ്റേജ് ഇതര മൽസരങ്ങൾ തുടങ്ങും.സംസ്കൃതം, അറബിക്, കന്നഡ സാഹിത്യോത്സവങ്ങളും ഇതോടനുബന്ധിച്ച് നടക്കും. എൽപി, യുപി, എച്ച്എസ്, എച്ച്എസ്എസ് വിഭാഗങ്ങളിലായി ബേക്കൽ ഉപജില്ലാ പരിധിയിലെ 76 വിദ്യാലയങ്ങളിൽ നിന്നുള്ള കലാപ്രതിഭകൾ മൽസരിക്കാനെത്തും. 290 ഇനങ്ങളിലായി 5500 മത്സരാർത്ഥികളാണുള്ളത്. സ്റ്റേജിന മൽസരങ്ങൾ 3 നു തുടങ്ങും. അന്നു വൈകിട്ടു 4 മണിക്ക് ഇ.ചന്ദ്രശേഖരൻ എംഎൽഎ കലോൽസവം ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ അധ്യക്ഷത വഹിക്കും. സർവീസിൽ നിന്നു വിരമിച്ച കാസർകോട് ഡിഡിഇ, കെ.വി.പുഷ്പ ടീച്ചർ, കലോൽസവ ലോഗോ രൂപകൽപന ചെയ്ത ആശു കാഞ്ഞങ്ങാട് എന്നിവർക്ക് എംഎൽഎ ഉപഹാരം സമ്മാനിക്കും. സ്വാഗത നൃത്തശിൽപവും ഉണ്ടാകും. സമാപന സമ്മേളനം 5 ന് വൈകുന്നേരം 4 മണിക്ക് സി.എച്ച്.കുഞ്ഞമ്പു എംഎൽഎ ഉദ്ഘാടനം ചെയ്യും. സംഘാടക സമിതി ചെയർപേഴ്‌സണും അജാനൂർ പഞ്ചായത്ത് പ്രസിഡന്റും ആയ ടി.ശോഭ അധ്യക്ഷത വഹിക്കും. കലോൽസവം നാടിന്റെ ഉൽസവമാക്കാൻ വിപുലമായ ഒരുക്കങ്ങൾ പൂർത്തിയായതായി സംഘാടക സമിതി ഭാരവാഹികൾ വാർത്താ സമ്മേളനത്തിൽ അറിയിച്ചു. സംഘാടക സമിതി ചെയർപേഴ്‌സൺ ടി.ശോഭ, വർക്കിങ് ചെയർമാൻ കെ.ജയൻ, ജനറൽ കൺവീനർ സരള ചെമ്മഞ്ചേരി, ട്രഷറർ ബേക്കൽ എഇഒ, പി.കെ.സുരേഷ്, സ്‌കൂൾ പ്രിൻസിപ്പൽ സൈജു ഫിലിപ്, സബ് കമ്മിറ്റി ഭാരവാഹികളായ പി.പ്രവീൺകുമാർ (ചെയർമാൻ- മീഡിയ), രാജേഷ് സ്‌കറിയ (കൺവീനർ- പ്രോഗ്രാം), പി.വി.ഗീത (കൺവീനർ- ഫിനാൻസ്), എം.ബാബു (കൺവീനർ – ഫുഡ് കമ്മിറ്റി )തുടങ്ങിയവർ വാർത്താ സമ്മേളനത്തിൽ പങ്കെടുത്തു
7 വേദികൾ: കവിത തുളുമ്പും പേരുകൾ മഹാകവി പി കുഞ്ഞിരാമൻ നായരുടെ ജന്മനാടായ വെള്ളിക്കോത്ത് നടക്കുന്ന ബേക്കൽ ഉപജില്ലാ കലോൽസവത്തിനൊരുക്കിയത് 8 വേദികൾ.
8 വേദികൾക്കും മഹാകവി പിയുടെ പ്രശസ്ത കവിതകളുടെ പേരുകളാണ് നൽകിയിരിക്കുന്നത്. സ്‌കൂളിലെ പ്രധാന വേദിക്ക് താമരത്തോണിയെന്നാണ് പേര്. വേദി 2 : അഴീക്കോടൻ ക്ലബ് (കളിയച്ഛൻ), വേദി 3: യങ്‌മെൻസ് ക്ലബ് (ചിലമ്പൊലി), വേദി 4: അടോട്ട് ജോളി ക്ലബ് (മണിവീണ), വേദി 5: നെഹ്‌റു ബാലവേദി (ശംഖൊലി), വേദി 6: അടോട്ട് പഴയസ്ഥാനം ഹാൾ (നീരാഞ്ജനം), വേദി 7: അടോട്ട് എകെജി ഹാൾ (ഉപാസന), വേദി 8: കാരക്കുഴി കമ്മ്യൂണിറ്റി ഹാൾ (പൂനിലാവ്) എന്നിവയാണ് മറ്റു വേദികൾ
*സിസിടിവികളുടെ ഓഡിറ്റിംഗ് നടത്താന്‍ ഡി.ജി.പിയുടെ നിര്‍ദ്ദേശം*എല്ലാ ജില്ലകളിലെയും പ്രധാന കേന്ദ്രങ്ങളും തെരുവുകളും പൂര്‍ണ്ണമായും സിസിടിവി പരിധിയില്‍ ലഭ്യമാക്കുന്നതിനുള്ള നടപടി വിവിധ വകുപ്പുകളുടെ സഹകരണത്തോടെ പൊലീസ് ഏകോപിപ്പിക്കും. ഇതിനായി സംസ്ഥാനത്തെ എല്ലാ ജില്ലകളിലും സ്ഥാപിച്ചിട്ടുളള ക്ലോസ് സര്‍ക്യൂട്ട് ടി.വി ക്യാമറകളുടെയും ഓഡിറ്റിംഗ് നടത്താന്‍ പൊലീസ് തീരുമാനിച്ചു. ഇതിന് ആവശ്യമായ നിര്‍ദ്ദേശം സംസ്ഥാന പൊലീസ് മേധാവി അനില്‍കാന്ത് ജില്ലാ മേധാവിമാര്‍ക്ക് നല്‍കിപൊലീസിന്‍റെ നിയന്ത്രണത്തിലുളള സിസിടിവി ക്യാമറകളുടെ എണ്ണം, ഇനം, സ്ഥാപിച്ചിരിക്കുന്ന സ്ഥലം, പൊലീസ് സ്റ്റേഷന്‍, പ്രവര്‍ത്തനരഹിതം എങ്കില്‍ അതിനുളള കാരണം എന്നിവ ജില്ലാ ക്രൈം റിക്കോര്‍ഡ്സ് ബ്യൂറോയും കണ്‍ട്രോള്‍ റൂമും അതത് പൊലീസ് സ്റ്റേഷന്‍ അധികൃതരും ശേഖരിച്ച് സൂക്ഷിക്കും. പൊലീസ് കണ്‍ട്രോള്‍ റൂമിലും സ്റ്റേഷനുകളിലും ഫീഡ് ലഭ്യമായ ക്യാമറകളുടെ വിവരങ്ങളും ശേഖരിക്കും. തദ്ദേശ സ്വയംഭരണ സ്ഥാപനങ്ങളും മറ്റ് സര്‍ക്കാര്‍ സ്ഥാപനങ്ങളും സ്ഥാപിച്ചിട്ടുളള സിസിടിവി ക്യാമറകളുടെ വിവരങ്ങള്‍ ശേഖരിക്കാനും നിര്‍ദ്ദേശിച്ചിട്ടുണ്ട്.
കൂടാതെ പൊതുസ്ഥലങ്ങളിലും വ്യാപാരസ്ഥാപനങ്ങളിലും സ്ഥാപിച്ചിട്ടുളള സിസിടിവി ക്യാമറകളുടെ വിവരങ്ങള്‍ അതത് സ്റ്റേഷനുകളില്‍ ശേഖരിച്ച് സൂക്ഷിക്കും. പൊലീസിന്റെ ക്യാമറകളില്‍ പ്രവര്‍ത്തനരഹിതമായവ ഉടനടി അറ്റകുറ്റപ്പണി നടത്തി പ്രവര്‍ത്തനക്ഷമമാകാന്‍ നടപടി സ്വീകരിക്കും. തദ്ദേശ സ്ഥാപനങ്ങളുടെയും മറ്റ് വകുപ്പുകളുടെയും ക്യാമറകളില്‍ കേടായത് നന്നാക്കാന്‍ അതത് വകുപ്പുകളോട് അഭ്യര്‍ത്ഥിക്കും.