ഐശ്വര്യത്തിന്റെയും സമൃദ്ധിയുടേയും ഉത്സവമായ ഓണത്തെ വരവേല്‍ക്കുന്നതിന് 250 കോടിയുടെ അവശ്യസാധനങ്ങളാണ് ഓണ വിപണി ഇടപെടലിനായി സപ്ലൈകോ സംഭരിച്ചിരിക്കുന്നതെന്ന് തുറമുഖം മ്യൂസിയം പുരാവസ്തു, പുരാരേഖ വകുപ്പ് മന്ത്രി അഹമ്മദ് ദേവര്‍കോവില്‍ പറഞ്ഞു.
ജില്ലാതല ഓണം ഫെയര്‍ കാസര്‍കോട് പുതിയ ബസ്സ്സ്റ്റാന്റില്‍ ഉദ്ഘാടനം ചെയ്യുകയായിരുന്നു അദ്ദേഹം.
ഉത്സവകാലങ്ങളിലെ വിപണി ഇടപെടലുകള്‍ നടത്തി അവശ്യ സാധനങ്ങള്‍ ന്യായവിലക്ക് ഗുണമേന്‍മയോടെ ഉപഭോക്താക്കളിലേക്ക് എത്തിക്കുക എന്ന ലക്ഷ്യത്തോടെയാണ് സപ്ലൈകോ ഓണം ഫെയറുകള്‍ സംഘടിപ്പിക്കുന്നതെന്നും മുന്‍ വര്‍ഷങ്ങളെ അപേക്ഷിച്ച്‌ വിപുലമായ രീതിയിലും, വിപണിയിലെ കടുത്ത മത്സരം നേരിടത്തക്ക വിധത്തിലുമാണ് സപ്ലൈകോ ജില്ലാതല ഫെയറുകള്‍ സംഘടിപ്പിക്കുന്നത്. ഓരോ മാസവും സംഭരിക്കുന്ന അവശ്യസാധനങ്ങളുടെ ഇരട്ടിയിലധികമാണ് ഓണക്കാലത്ത് സംഭരിക്കുന്നത്. ഉത്സവ വിപണിയെ കൂടുതല്‍ കരുത്തുറ്റതും കുറ്റമറ്റതുമാക്കുന്നതിന് വേണ്ടിയാണ് ഇത്തരം സംവിധാനങ്ങളെല്ലാം ക്രമീകരിച്ചിരിക്കുന്നതെന്ന് മന്ത്രി പറഞ്ഞു.
1600ഓളം റീട്ടെയില്‍ ഔട്ട്‌ലറ്റുകളിലായി 4500 ലധികം തൊഴിലാളികളിലൂടെ സമാനതകളില്ലാത്ത മാതൃകയാണ് സപ്ലൈകോയുടേത്. സബ്‌സിഡി സാധനങ്ങള്‍ വാങ്ങുവാനായി ഒരു മാസം 40 ലക്ഷത്തോളം ഉപഭോക്താക്കള്‍ സപ്ലൈകോ വില്‍പ്പനശാലകളെ ആശ്രയിക്കുന്നു. രാജ്യത്തെങ്ങുമില്ലാത്ത അത്രയും വിപുലവും കാര്യക്ഷമവുമായ പൊതുവിതരണ സംവിധാനവും, വിപണി ഇടപെടല്‍ ശൃംഖലയുമുള്ള സംസ്ഥാനമാണ് കേരളം. കേന്ദ്ര സര്‍ക്കാറിന്റെ ഇക്കണോമിക്‌സ് ആന്റ് സ്റ്റാറ്റിസ്റ്റിക്‌സ് വകുപ്പ് പുറത്തുവിട്ട ഉപഭോക്തൃവില സൂചികയെ അടിസ്ഥാനപ്പെടുത്തിയ പണപ്പെരുപ്പത്തിന്റെ നില പരിശോധിക്കുമ്ബോള്‍ ഏറ്റവും മെച്ചപ്പെട്ട നിലയിലാണ് കേരളത്തിന്റെ സ്ഥാനം.
പണപ്പെരുപ്പത്തിന്റെ ദേശീയ ശരാശരി 7.44% ആയിരിക്കുമ്ബോള്‍, കേരളത്തില്‍ അത് 6.43% മാത്രമാണ്. ഈ സാഹചര്യങ്ങളുടെയെല്ലാം പശ്ചാത്തലത്തില്‍, ഓണക്കാലത്ത് സംസ്ഥാനത്ത് വിപുലമായ തോതില്‍ സപ്ലൈകോയുടെ ആഭിമുഖ്യത്തില്‍ സംഘടിപ്പിക്കുന്ന ഓണം ഫെയറുകളില്‍ പൊതുജന പങ്കാളിത്തം വര്‍ദ്ധിക്കുമെന്ന് സര്‍ക്കാറിന് ഉറപ്പുണെന്ന് മന്ത്രി പറഞ്ഞു.
ചടങ്ങില്‍ എന്‍.എ നെല്ലിക്കുന്ന് എം.എല്‍.എ അധ്യക്ഷനായി. രാജ്‌മോഹന്‍ ഉണ്ണിത്താന്‍ എം.പിമുഖ്യാതിഥിയായി. ജില്ലാ പഞ്ചായത്ത് പ്രസിഡന്റ് പി. ബേബി ബാലകൃഷ്ണന്‍ ആദ്യ വില്‍പന നടത്തി. വാര്‍ഡ് കൗണ്‍സിലര്‍ വരപ്രസാദ് കോട്ടക്കണ്ണി, രാഷ്ട്രീയപാര്‍ട്ടി പ്രതിനിധികളായ ടി.എം.എ കരീം, ബിജു ഉണ്ണിത്താന്‍, കെ. നീലകണ്ഠന്‍, എം. വിജയകുമാര്‍ റൈ, കല്ലട്ര മാഹിന്‍ഹാജി, കെ.പ്രമോദ്, കരീം ചന്തേര, ടി.എസ്.എ ഗഫൂര്‍, സണ്ണി അരമന, വി.കെ രമേശ്, കരിവെള്ളൂര്‍ വിജയന്‍, അബ്ദുള്‍റഹ്‌മാന്‍, നാഷണല്‍ അബ്ദുള്ള, കുര്യാക്കോസ് പ്ലാപ്പറമ്ബില്‍ തുടങ്ങിയവര്‍ സംസാരിച്ചു. സപ്ലൈകോ റിജിയണല്‍ മാനേജര്‍ എന്‍. രഘുനാഥ് സ്വാഗതവും ജില്ലാ സപ്ലൈ ഓഫീസര്‍ എ.സജാദ് നന്ദിയും പറഞ്ഞു. സപ്ലൈകോ ജീവനക്കാര്‍, മാധ്യമപ്രവര്‍ത്തകര്‍, ഉപഭോക്താക്കള്‍ തുടങ്ങിയവര്‍ പങ്കെടുത്തു.
