തടവുകാർക്ക് നിയമ ബോധവത്കരണ ജീവിത നൈപുണ്യ സംരഭകത്വ വികസന പരിശീലനം ആരംഭിച്ചു
സാമൂഹ്യ നീതിവകുപ്പിന്റെ നേർവഴി പദ്ധതിയുടെ ഭാഗമായി ഹോസ്ദുർഗ്ഗ് ജില്ലാ ജയിൽ തടവുകാര്‍ക്കായി കാസർകോട് ജില്ലാ പ്രൊബേഷൻ ഓഫീസും കാസർകോട് റൂറൽ സെൽഫ്‌ എംപ്ലോയ്‌മെന്റ് ട്രെയിനിങ് ഇൻസ്റ്റിറ്റ്യൂട്ടും കാസർകോട് ജില്ലാ നിയമ സേവന അതോറിറ്റിയും (ഡി.എൽ.എസ്.എ) സംയുക്തമായി സംഘടിപ്പിക്കുന്ന നിയമ ബോധവത്കരണ ജീവിത നൈപുണ്യ- സംരംഭകത്വവികസന പരിശീലന പരിപാടി ആരംഭിച്ചു. ഹോസ്ദുർഗ്ഗ് അസിസ്റ്റന്റ് സെഷന്‍സ്‌ ജഡ്ജ് എം.സി.ബിജു പരിപാടി ഉദ്ഘാടനം ചെയ്തു. ജില്ലാ ജയില്‍ സുപ്രണ്ട് കെ.വേണു വിന്റെ അദ്ധ്യക്ഷത വഹിച്ചു. ജില്ലാ സാമൂഹ്യ നീതി ഓഫീസർ ആര്യ പി രാജ് മുഖ്യാതിഥിയായി. കുറ്റകൃത്യങ്ങളിൽ ഉൾപ്പെട്ടു ജയിലിൽ കഴിയുന്നവർക്ക് നല്ലനടപ്പു നിയമത്തെക്കുറിച്ചും മറ്റു പ്രധാന നിയമസംവിധാനങ്ങളെക്കുറിച്ചും അവബോധം നൽകിക്കൊണ്ടും ലോകാരോഗ്യസംഘടന നിർദേശിച്ച ജീവിത നൈപുണികളെ ആധാരമാക്കിയുമാണ് സംരംഭകത്വ പരിശീലനം നൽകുന്നത്. അത് വഴി അവര്‍ വീണ്ടും കുറ്റകൃത്യങ്ങളില്‍ ഏര്‍പ്പെടുന്നതിനുള്ള പ്രവണത കുറക്കുന്നതിനും സാധിക്കും. മൂന്ന് ദിവസം നീണ്ടുനിൽക്കുന്ന പരിശീലന പരിപാടിയില്‍ കാസർകോട് ചീഫ് ലീഗൽ എയിഡ് ഡിഫെൻസ് കൗൺസിൽ അഡ്വ.കെ.എ.സാജൻ തടവുകാരുടെ അവകാശങ്ങളും കടമകളും നല്ലനടപ്പ് നിയമത്തിന്റെ പശ്ചാത്തലത്തിൽ എന്ന വിഷയത്തിൽ അവതരണം നടത്തി. പേപ്പർ ക്യാരിബാഗ് ആൻറ് ലോങ്ങ്‌ കവർ നിർമാണം എന്നിവയിൽ ആണ് സംരഭകത്വ പരിശീലനം. വെള്ളിക്കോത്ത് ആർ.എസ്.ഇ.ടി.ഐ ഡയറക്ടർ വി.പി.ഗോപി, പി.രമ, എൻ നിർമൽ കുമാർ, ഷൈജിത്ത് കരുവാക്കോട്, സുഭാഷ് വനശ്രീ, ഇർഫാദ് മായിപ്പാടി, ജില്ലാ പ്രൊബേഷൻ ഓഫീസർ പി.ബിജു, സുപ്രണ്ട് കെ.വേണു എന്നിവരാണ് പരിശീലനത്തിനു നേതൃത്വം നൽകുന്നത്.
