പ്രതിസന്ധികളെ അതിജീവിക്കാൻ വിശ്വാസികൾ പ്രാപ്തരാകണം:സാദിഖ് : ഈദ് ആഘോഷങ്ങളിൽ പലസ്തീൻ ഐക്യദാർഡ്യം

കാഞ്ഞങ്ങാട്:വ്രതാനുഷ്ടാനത്തിലൂടെ നേടിയെടുത്ത നൻമകളും ദാർഢ്യദയും ചോർന്ന് പോകാതെ എല്ലാതരം പ്രതിസന്ധികളെയും അതിജീവിക്കാൻ വിശ്വാസികൾ പ്രാപ്തരാവണമെന്ന് പടന്ന ഐ സി ടി പ്രിൻസിപ്പാൾ യു.സി.മുഹമ്മദ് സാദിഖ്.

നീതിയുടെയും നിഷ്പക്ഷതയുടെയും പക്ഷത്ത് നിലയുറപ്പിക്കാനും പൊതു നൻമയിൽ യോജിപ്പിൻ്റെ മാർഗ്ഗം കണ്ടെത്താനും വിശ്വാസി സമൂഹം ബാധ്യസ്ഥരായിരിക്കണമെന്ന് കാഞ്ഞങ്ങാട് ഹിറാ ഈദ് ഗാഹിൽ പെരുന്നാൾ നമസ്കാരത്തിന് നേതൃത്വം കെണ്ടുള്ള പ്രഭാഷണത്തിൽ സാദിഖ് പറഞ്ഞു.

വിശുദ്ധ റമാദിലും പെരുന്നാൾ ദിനത്തിൽ പോലും ഇസ്രായേൽ ക്രൂരതയ്ക്കിരയായി കൊണ്ടിരിക്കുന്ന പലസ്തീൻ ജനതയോടും ഗസയിലെ പോരാളികളൊടുമുള്ള ഐക്യദാർഡ്യം ഈദ് ആഘോഷങ്ങളിലുടനീളം പ്രകടമായിരുന്നു.

ആഗോള തലത്തിലും ദേശീയ തലത്തിലും വലിയ തോതിലുളള പരീക്ഷണമാണ് വിശ്വാസികൾ നേരിട്ട് കൊണ്ടിരിക്കുന്നത്,ഇന്ത്യയിൽ മുസ്ലിം സമൂഹത്തിൻ്റെ പൗരത്വം പോലും തട്ടിയെടുക്കാൻ ഭരണാധികാരികൾ നീക്കം നടത്തുന്നു,എല്ലാവിധ ഭിന്നതകളും മറന്ന് യോജിപ്പിൻ്റെ മാർഗ്ഗം

കണ്ടെത്താൻ വിശ്വാസികൾ സന്നദ്ധരാവണമെന്നും അദ്ദേഹം പറഞ്ഞു.

സ്ത്രീകളുൾപ്പെടെ നൂറുകണക്കിനാളുകൾ ഈദ് ഗാഹിൽ പ്രാർത്ഥനയ്ക്കെത്തി.

പരസ്പരം ആശ്ളേഷിച്ചും മധുര പലഹാരങ്ങൾ കൈമാറിയുമാണ് വിശ്വാസികൾ പിരിഞ്ഞത്.

ഇതര മതസ്ഥരായ ഒട്ടേറെ പേരും ആശംസകൾ അറിയിക്കാൻ എത്തിയിരുന്നു.

ഹോസ്ദുർഗ്ഗ് ടൗൺ ജുമാമസ്ജിദിൽ ഒ.പി.അബ്ദുള്ള സഖാഫിയും കോട്ടച്ചേരി ബദരിയ മസ്ജിദിൽ റഷീദ് സഅദിയും അതിഞ്ഞാൽ ജുമാമസ്ജിദിൽ ഖത്തീബ് ടി.പി.അബ്ദുൾ ഖാദർ അസ്ഹരിയും കോയാപ്പള്ളിയിൽ കരീം മുസ്ലിയാരും അജാനൂർ തെക്കെപ്പള്ളിയിൽ മുഹമ്മദ് ഇർഷാദ് അസ്ഹരിയും ഇഖ്ബാൽ പള്ളിയിൽ ഷംസുദ്ദീൻ സഹദിയും പ്രാർത്ഥനയ്ക്ക് നേതൃത്വം നൽകി.

പടം:കാഞ്ഞങ്ങാട് ഹിറ ഈദ് ഗാഹിൽ നടന്ന പെരുന്നാൾ നമസ്കാരം