സ്‌കൂള്‍ ബസ് ഓടിക്കുന്നതിനിടെ ഡ്രൈവര്‍ക്ക് ഹൃദയാഘാതം മൂലം ദാരുണാന്ത്യം. തൃത്താല സ്വദേശി ഫൈസല്‍ ആണ് മരിച്ചത്.
പാലക്കാട് : സ്‌കൂള്‍ ബസ് ഓടിക്കുന്നതിനിടെ ഡ്രൈവര്‍ക്ക് ഹൃദയാഘാതം മൂലം ദാരുണാന്ത്യം. തൃത്താല സ്വദേശി ഫൈസല്‍ ആണ് മരിച്ചത്.
ഇന്ന് രാവിലെയോടെയായിരുന്നു സംഭവം. തൃത്താല ഐഇഎസ് ഇംഗ്ലീഷ് മീഡിയം സ്‌കൂളിലെ കുട്ടികളുമായി സ്‌കൂളിലേക്ക് പോകവെയാണ് ദാരുണമായ സംഭവം. കൂട്ടുപാതയില്‍ വച്ച്‌ ഹൃദയാഘാതം ഉണ്ടാകുകയായിരുന്നു. ഇദ്ദേഹത്തെ പട്ടാമ്ബിയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല.
കടുത്ത നെഞ്ചുവേദന അനുഭവപ്പെട്ടതിനെ തുടര്‍ന്ന് ഫൈസല്‍ ബസ് റോഡരികിലേക്ക് ചേര്‍ത്തു നിര്‍ത്തി. ശേഷം കാര്യങ്ങളെല്ലാം ബസിലെ ആയയെ പറഞ്ഞേല്‍പ്പിച്ചു. പിന്നാലെ സുഹൃത്തിനെ വിളിച്ച്‌ ആശുപത്രിയിലേക്ക് പോയെങ്കിലും മരണപ്പെടുകയായിരുന്നു. ആയ വിളിച്ച്‌ വിവരം അറിയിച്ചതിന്റെ അടിസ്ഥാനത്തില്‍ മറ്റൊരു ഡ്രൈവറെത്തി കുട്ടികളെ സ്‌കൂളിലെത്തിച്ചു.
