മുസ്ലിം ലീഗ് കാസർകോട് ജില്ലാ പ്രസിഡന്റും കാസർകോട് നഗരസഭ മുൻ ചെയർമാനുമായ തളങ്കര കടവത്തെ ടിഇ അബ്ദുല്ല (65) അന്തരിച്ചു

Share

കാസർകോട്: മുസ്ലിം ലീഗ് കാസർകോട് ജില്ലാ പ്രസിഡന്റും കാസർകോട് നഗരസഭ മുൻ ചെയർമാനുമായ തളങ്കര കടവത്തെ ടിഇ അബ്ദുല്ല (65) അന്തരിച്ചു.കോഴിക്കോട് ബേബി മെമ്മോറിയൽ ആശുപത്രിയിലായിരുന്നു. ഉത്തരകേരളത്തിൽ മുസ്ലിം ലീഗിന് ജനകീയ മുഖം നൽകിയ മുൻ എംഎൽഎ പരേതനായ ടിഎ ഇബ്രാഹിമി ന്റെയും സൈനബബി യുടെയും മകനാണ്. എംഎസ്എഫിലൂടെയാണ് പൊതുരംഗത്ത് വരുന്നത്. തളങ്കര മുസ് ലിം ഹൈസ്കൂൾ യൂണിറ്റ് എംഎസ്എഫ് പ്രസിഡന്റായിരുന്നു. ഹൈസ്കൂൾ ലീഡറായി എതിരില്ലാതെ തിരഞ്ഞെടുക്കപ്പെട്ടിട്ടുണ്ട്. 1978ൽ തളങ്കര വാർഡ് മുസ് ലിം ലീഗ് സെക്രട്ടറിയായി. അവിഭക്ത കണ്ണൂർ ജില്ലാ മുസ് ലിം ലീഗ് പ്രവർത്തക സമിതി അംഗം, കാസർകോട് മുനിസിപ്പൽ യൂത്ത് ലീഗ് വൈസ് പ്രസിഡന്റ്, കാസർകോട് നിയോജക മണ്ഡലം യൂത്ത് ലീഗ് പ്രസിഡന്റ്, കാസർകോട് നിയോജക മണ്ഡലം മുസ് ലിം ലീഗ് ജനറൽ സെക്രട്ടറി, കാസർകോട് ജില്ലാ മുസ് ലിം ലീഗ് വൈസ് പ്രസിഡന്റ്, കാസർകോട് വികസന അതോറിറ്റി ചെയർമാൻ എന്നീ സ്ഥാനങ്ങൾ വഹിച്ചടിഇ അബ്ദുല്ല 2008 മുതൽ സംസ്ഥാന മുസ്ലിം ലീഗ് പ്രവർത്തക സമിതി അംഗമാണ്. ചെർക്കളം അബ്ദുല്ലയുടെ നിര്യാണത്തെ തുടർന്നാണ് മുസ്ലിം ലീഗ് ജില്ലാ പ്രസിഡന്റ് സ്ഥാനം ഏറ്റെടുത്തത്. 1988 മുതൽ കാസർകോട് നഗരസഭ കൗൺസിലറായി.2000 ൽ തളങ്കര കുന്നിൽ നിന്നും 2005ൽ തളങ്കര പടിഞ്ഞാറിൽ നിന്നും എതിരില്ലാതെ തിരഞ്ഞെടുക്കപ്പെട്ടു.മൂന്ന് തവണ കാസർകോട് നഗരസഭ ചെയർമാൻ പദവി അലങ്കരിച്ചു. അദ്ദേഹം ചെയർമാനായ 2000-2005 കാലത്ത് കേരളത്തിലെ മികച്ച നഗരസഭയായി കാസർകോടിനെ തിരഞ്ഞെടുത്തു.കാസർകോട് സംയുക്ത മുസ്ലീം ജമാഅത്ത് ജനറൽ സെക്രട്ടറി, മാലിക് ദീനാർ വലിയ ജുമുഅത്ത് പള്ളി വൈസ് പ്രസിഡണ്ട്, ദഖീറത്തുൽ ഉഖ്റാ സംഘം പ്രസിഡണ്ട്, ടി. ഉബൈദ് ഫൗണ്ടേഷൻ ട്രഷറർ തുടങ്ങിയ സ്ഥാനങ്ങളും വഹിക്കുന്നു. ഫുട്ബോൾ കളിക്കാരൻ കൂടിയായിരുന്ന ടി.ഇ അബ്ദുല്ല നേരത്തെ കാസർകോട് ജില്ലാ ഫുട്ബോൾ അസോസിയേഷൻ പ്രസിഡണ്ടായും പ്രവർത്തിച്ചിട്ടുണ്ട്. കേരളത്തിലെ നഗരസഭാ ചെയർമാൻമാരുടെ കൂട്ടായ്മയായ ചെയർമാൻസ് ചേമ്പേഴ്സിന്റെ നേതൃനിരയിലും പ്രവർത്തിച്ചിട്ടുണ്ട്. കാസർകോടിന്റെ വികസന ശിൽപികളിലൊരാൾ എന്ന നിലയിലാണ് അറിയപ്പെടുന്നത്. നഗരസഭാ കോൺഫറൻസ് ഹാളും സന്ധ്യാരാഗം ഓഡിറ്റോറിയവുമെല്ലാം ടി.ഇ അബ്ദുല്ലയുടെ സംഭാവനയാണ്.

Back to Top