വെള്ളിക്കോത്ത് സ്വദേശി കൃഷ്ണാ രാജീവിന് കലാ രത്ന കിരീടം, ഗൾഫ് രാജ്യത്തെ ഏറ്റവും വലിയ സ്കൂൾ കലോത്സവത്തിന് പരിസമാപ്തി

ബഹ്റൈൻ : വെള്ളിക്കോത്ത് സ്വദേശി കൃഷ്ണാ രാജീവിന് കലാ രത്ന കിരീടം, ഗൾഫ് രാജ്യത്തെ ഏറ്റവും വലിയ സ്കൂൾ കലോത്സവത്തിന് പരിസമാപ്തി. 2022 തരംഗ് ഫിനാലേയിലാണ് ഏറ്റവും കൂടുതൽ പോയന്റുകൾ കരസ്ഥമാക്കി വിജയിച്ചത്. 120ലധികം ഇനങ്ങളിലായി നാലായിരത്തിലധികം വിദ്യാർത്ഥികളാണ് ജിസിസിയിലെ ഏറ്റവും വലിയ കലാമാമാങ്കത്തിൽ പങ്കെടുത്തത്. സ്റ്റേജ് സ്റ്റേജിതര മത്സരങ്ങളിൽ എട്ടോളം ഇനങ്ങളിൽ ഏറ്റവും കൂടുതൽ വ്യക്തികത പോയന്റുകൾ (66 പോയിന്റ്) നേടിയാണ് ഇന്ത്യൻ സ്കൂൾ ബഹറിനിലെ പത്താം ക്ലാസ്സ്‌ വിദ്യാർത്ഥിയായ കൃഷ്ണാ രാജീവ് കിരീടം ചൂടിയത്.കവിതാ രചനമലയാളം ഉപന്യാസം, മോണോആക്ട്, കർണാടിക്ക് സംഗിതം, ലളിത ഗാനം എട്ടോളം ഇനങ്ങളിൽ പങ്കെടുതാണ് കലാകിരീടം കരസ്ഥമാക്കിയത്.

ഗായകനും മാധ്യമ പ്രവർത്തകനും കാസറഗോഡ് വെള്ളികോത്ത് സ്വദേശിയുമായ രാജീവിന്റെയും ശുഭപ്രഭയുടെയും മകളാണ് കൃഷ്ണ. ഇരട്ട സഹോദരനായ ഹരിയും ബഹറൈൻ ഇന്ത്യൻ സ്കൂളിൽ പഠിക്കുന്നു.

മുൻ വർഷങ്ങളിൽ മൂന്നാം ക്ലാസ്സിൽ ഗ്രൂപ്പ്‌ ചാമ്പ്യൻ, അഞ്ചാം ക്ലാസിൽ കലാ രത്ന, ഏഴാം ക്ലാസിൽ ഗ്രൂപ്പ് ചാമ്പ്യൻ എന്നി നിലകളിൽ ചെറുപ്പം മുതലേ കഴിവ് തെളിയിച്ചു. നരേന്ദ്രപ്രസാദ് അനുസ്മരണ നാടക മത്സരങ്ങളിൽ മികച്ച ബാലതാരമായിരുന്നു. ഇന്റർ സ്കൂൾ മത്സരങ്ങളിൽ ജൂനിയർ അംബാസിഡർ, വിവിധ ചാനൽ പരിപാടികളിൽ അവതാരികയയും പങ്കെടുത്തു കഴിവ് തെളിയിച്ചു.