കുരുന്നുകളെ വരവേൽക്കാൻ വർണ ചിത്ര കാഴ്ചകൾ ഒരുക്കി പാലക്കുന്ന് അംബിക സ്കൂൾ 

പാലക്കുന്ന്: അവധി പൂർത്തിയാക്കി തിരിച്ചെത്തുന്നവരെയും നവാഗതരായ കുരുന്നുകളെയും ഏറെ പുതുമകളോടെ വരവേൽക്കാൻ പാലക്കുന്ന് അംബിക ഇംഗ്ലീഷ് മീഡിയം സ്കൂളിൽ ഒരുക്കങ്ങൾ പൂർത്തിയാകുന്നു. സ്കൂൾ തുടങ്ങിയതിന്റെ നാല്പതാം വാർഷികവും സിബിഎസ്ഇ അഫിലിയേഷൻ കിട്ടിയതിന്റെ ഇരുപത്തഞ്ചാം വാർഷികവും ആഘോഷിക്കുന്നതിന്റെ ഭാഗമായി വിദ്യാർത്ഥികൾക്കായി നിരവധി സൗകര്യങ്ങളാണ് ഇവിടെ ഒരുക്കിയിരിക്കുന്നത്. കുട്ടികളുടെ മനം കവരും വിധം സ്കൂൾ മതിലുകളിൽ വർണ ചിത്രങ്ങൾ വരച്ച് ആകർഷകമാക്കുന്ന തിരക്കിലാണ് നിറങ്ങളുടെ കൂട്ടുകാരനായ ചിത്രകാരൻ ദേവദാസ് പെരിയയും സ്കൂളിലെ ചിത്രകല അധ്യാപകനായ രാജു മാസ്റ്ററും. ഈ അധ്യയനവർഷം മുതൽ സ്കൂൾ യൂണിഫോമിലും മാറ്റങ്ങൾ വരുത്തിയിരിക്കുകയാണ്. അതോടൊപ്പം ക്ലാസ് മുറികളും അതിമനോഹരമാക്കി. ഡിജിറ്റൽ സാങ്കേതികവിദ്യയുടെ സഹായത്തോടെ അധ്യായനം നടത്തുന്നതിന് വേണ്ടിയുള്ള സജ്ജീകരണങ്ങളും ഇവിടെ ഒരുക്കിയിരിക്കുകയാണെന്ന് വിദ്യാഭ്യാസ സമിതി ഭാരവാഹികളും പ്രിൻസിപ്പൽ എ. ദിനേശനും പറഞ്ഞു.