മാണിക്കോത്ത് മാണിക്യമംഗലം പുന്നക്കാല്‍ ഭഗവതി ക്ഷേത്രത്തില്‍ മഡിയന്‍ കൂലോത്തു നിന്നും ദീപവും തിരിയും എത്തിയതോടെ പാട്ട് മഹോത്സവത്തിന് തിരി തെളിഞ്ഞു
കാഞ്ഞങ്ങാട്: കോവിഡ് മഹാമാരിയുടെ ഇടവേളയ്ക്ക് ശേഷം മാണിക്കോത്ത് മാണിക്യമംഗലം പുന്നക്കാല്‍ ഭഗവതി ക്ഷേത്രത്തില്‍ നവംബര്‍ 17 മുതല്‍ 22 വരെ 6 ദിവസങ്ങളിലായി പാട്ട് മഹോത്സവം നടക്കുകയാണ്. പാട്ട് മഹോത്സവത്തിന് തുടക്കം കുറിച്ചുകൊണ്ട് മഡിയന്‍ കൂലോം ക്ഷേത്രപാലക ക്ഷേത്രത്തില്‍ നിന്നും ആചാര സ്ഥാനികരുടെയും ക്ഷേത്ര ഭാരവാഹികളുടെയും മറ്റ് ഭക്തജനങ്ങളുടെയും നേതൃത്വത്തില്‍ ദീപവും തിരിയും കൊണ്ടുവന്നു. തുടര്‍ന്ന് പൂവും അരിയും കൊടുക്കല്‍ ചടങ്ങ് നടന്നു. പാട്ട് മഹോത്സവത്തിന്റെ ഭാഗമായി ഇനിയുള്ള ദിവസങ്ങളില്‍ പന്തല്‍ തിരുവായുധം എഴുന്നള്ളത്ത്, വിവിധ പൂജകള്‍, എഴുന്നള്ളത്ത് എന്നിവ നടക്കും. സമാപന ദിവസമായ നവംബര്‍ 22ന് രാവിലെ 10 മണിക്ക് തിരുവായുധം എഴുന്നള്ളത്തും 10 30 ന് പൂജയും 11:00 മണിക്ക് എഴുന്നള്ളത്തും ഉച്ചയ്ക്ക് 12 മണിക്ക് ഇളനീരാട്ടവും അതിനുശേഷം അന്നദാനവും നടക്കും. വൈകുന്നേരം 3 മണിക്ക് പന്തല്‍ തിരുവായുധം എഴുന്നള്ളത്തും 4 മണിക്ക് കളത്തില്‍ അരിയിടലും 7 മണിക്ക് അരങ്ങ് പറിക്കല്‍ ചടങ്ങോടെ ഉത്സവത്തിന് സമാപനമാകും.
