Category: Kerala

പള്ളിക്കര : പൂച്ചക്കാട്ടെ പ്രവാസി വ്യവസായി ഗഫൂർ ഹാജിയുടെ മരണത്തിലെ ദുരൂഹത നീക്കണമെന്നാവശ്യപ്പെട്ട് നാട്ടുകാർ കർമസമിതി രൂപീകരിച്ചു. പൂച്ചക്കാട് ഹൈദ്രോസ് ജുമാ മസ്ജിദ് മദ്രസാ പരിസരത്ത് ചേർന്ന സർവ്വകക്ഷി കർമസമിതി രൂപീകരണ യോഗം സി.എച്ച്.കുഞ്ഞമ്പു എം.എൽ.എ ഉദ്ഘാടനം ചെയ്തു.

പൂച്ചക്കാട് ജമാഅത്ത് പ്രസിഡണ്ട് തർക്കാരി മുഹമ്മദ് കുഞ്ഞി ഹാജി അധ്യക്ഷനായി. കമ്മിറ്റി ആദ്യഘട്ടമായി ജില്ലാ പോലീസ് മേധാവിക്കും കളക്ടർക്കും നിവേദനം നൽകാൻ തീരുമാനിച്ചു.

ഏപ്രിൽ 14 ന് പുലർച്ചെയാണ് പ്രവാസി വ്യവസായിയായ പൂച്ചക്കാട് ഫാറൂഖിയ മസ്ജിദിന് സമീപത്തെ ബൈത്തുൽ റഹ്മയിലെ എം.സി. ഗഫൂർ ഹാജിയെ വീട്ടിൽ മരിച്ച നിലയിൽ കണ്ടെത്തിയത്.

യോഗത്തിൽ ബ്ലോക്ക് പഞ്ചായത്ത് പ്രസിഡണ്ട് കെ.മണികണ്ഠൻ, പഞ്ചായത്ത് പ്രസിഡണ്ട് എം.കുമാരൻ, വൈസ് പ്രസിഡണ്ട് നസ്നീം വഹാബ്, മെമ്പർ ഹസീന മുനീർ, ജമാ അത്ത് സെക്രട്ടറി കെ.എസ്.മുഹാജിർ, ഹക്കീം കുന്നിൽ, പി.കെ.അബ്ദുള്ള, എ ഹമീദ് ഹാജി, സിദ്ദിഖ് പള്ളിപ്പുഴ, എം.എ.ലത്തീഫ്, സുകുമാരൻ പൂച്ചക്കാട്, പി.കെ.അബ്ദുൾ റഹ്മാൻ മാസ്റ്റർ, ടി സി സുരേഷ്, ബി.ബിനോയ്, അബ്ബാസ് തെക്കുപുറം, ചോണായി മുഹമ്മദ് കുഞ്ഞ, മാഹിൻ പൂച്ചക്കാട്, മുഹമ്മദലി പൂച്ചക്കാട്, അബൂബക്കർ കപ്പണ, മൂസ ചിറക്കാൽ എന്നിവർ സംസാരിച്ചു.

കർമസമിതി ഭാരവാഹികൾ :രാജ് മോഹൻ ഉണ്ണിത്താൻ എം.പി, സി.എച്ച് കുഞ്ഞമ്പു എം.എൽ.എ, ബ്ലോക്ക് പഞ്ചായത്ത് പ്രസിഡണ്ട് കെ.മണി കണ്ഠൻ, ഗ്രാമ പഞ്ചായത്ത് പ്രസിഡണ്ട് എം.കുമാരൻ, വൈസ് പ്രസിഡണ്ട് നസ്നീം വഹാബ്, ഗ്രാമ പഞ്ചായത്ത് മെമ്പർമാരായ സിദ്ദീഖ് പള്ളിപ്പുഴ, ഹസീന മുനീർ, അബ്ബാസ് തെക്കുപുറം എന്നിവർ രക്ഷാധികാരികൾ

അസൈനാർ ആമു ഹാജി (ചെയർമാൻ), സുകുമാരൻ പൂച്ചക്കാട് (ജനറൽ കൺവീനർ) ബി.കെ.ബഷീർ |ഖജാഞ്ചി)

പളളിക്കര: ഗഫൂർ ഹാജിയുടെ മരണത്തിൽ ദൂരുഹത വർദ്ധിക്കുന്നു, ബന്ധുക്കളുടെ പരാതിയിൽ ഖബറിസ്ഥാനിൽ നിന്നും മൃതദേഹമെടുത്ത് പോസ്റ്റുമോർട്ടം ചെയ്തത് ഉന്നത ഉദ്യേഗസ്ഥരുടെ മേൽനോട്ടത്തിൽ,

സബ് കലക്ടർ സുഫിയാൻ അഹമ്മദിന്റെ നേരിട്ടുള്ള മേൽനോട്ടത്തിൽ പരിയാരം മെഡിക്കൽ പോലിസ് സർജൻ പോസ്റ്റ്മോർട്ടം നിയന്ത്രിച്ചു

പൂച്ചക്കാട്ടെ ഗൾഫ് വ്യവസായി എംസി അബ്ദുൽ ഗഫൂറിന്റ മരണത്തിന്റെ അന്വേഷണത്തിന്റെ ഭാഗമായി ഇന്ന് രാവിലെ 9 :00 മണിയോടെ പോസ്റ്റ് മോർട്ടം നടപടി തുടങ്ങിയത്.

പൂച്ചക്കാട് ജുമാ മസ്ജിദ് ഖബർസ്ഥാനിലെ ഖബറിടം കുഴിച്ച് മൃതദേഹം പുറത്തെടുക്കുന്ന നടപടി 10 മണിയോടെ തന്നെ തുടങ്ങിയിരുന്നു. തുടർന്നായിരുന്നു പരിയാരത്തെ കണ്ണൂർ മെഡികൽ കോളജ് ആശുപത്രിയിലെ പോലീസ് സർജന്റെ നേതൃത്വത്തിൽ പോസ്റ്റ് മോർട്ടം ചെയ്തത്.

കാഞ്ഞങ്ങാട് ആർഡിഒയുടെ സാന്നിധ്യത്തിൽ ബേക്കൽ ഡിവൈഎസ്പി സികെ സുനിൽകുമാർ, ഇൻസ്‌പെക്ടർ യുപി വിപിൻ എന്നിവരുടെ നേതൃത്വത്തിലാണ് നടപടികൾ പുരോഗമിക്കുന്നത്. ജുമാ മസ്ജിദ് ഖബർ സ്ഥാനിൽ തയ്യാറാക്കിയ ടെന്റിൽ വെച്ചാണ് പോസ്റ്റ് മോർട്ടം നടക്കുന്നത്. പോലീസിന്റെ അപേക്ഷയിൽ ആർ ഡി ഒ പോസ്റ്റ് മോർട്ടത്തിന് കഴിഞ്ഞ ദിവസം അനുമതി നൽകിയിരുന്നു.

ബന്ധുക്കളുടെ പരാതിയിൽ ബേക്കൽ പോലീസ് അസ്വഭാവിക മരണത്തിന് കേസെടുത്തതോടെയാണ്പൂച്ചക്കാട്ഫാറൂഖിയ മസ്ജിദിനടുത്ത് ബൈത്തുൽ റഹ്മയിലെ ഗഫൂർ ഹാജിയുടെ മരണത്തിലെ ദുരുഹത ഉയർന്നുവന്നത്

കഴിഞ്ഞ ഏപ്രിൽ 13 ന് വൈകീട്ട് 5.30നും 14ന് പുലർചെ അഞ്ചു മണിക്കുമിടയിലാണ് ഗഫൂറിനെ വീട്ടിൽ മരിച്ച നിലയിൽ കണ്ടെത്തിയതെന്ന് ബന്ധുക്കൾ നൽകിയ പരാതിയിൽ പറയുന്നു. ഗഫൂറിന്റെ മരണസമയത്ത് വീട്ടിൽ മറ്റാരും ഉണ്ടായിരുന്നില്ല.ഭാര്യയും മക്കളും ബന്ധുവീട്ടിൽ പോയിരുന്നു. ഹൃദയാഘാതമാകാം മരണകാരണമെന്ന് കരുതി മൃതദേഹം ഖബറടക്കുകയും ചെയ്തിരുന്നു.

പിന്നീട് വീട്ടിലുണ്ടായിരുന്ന 612 പവൻ സ്വർണം നഷ്ടമായെന്ന് ബന്ധുക്കൾ കണ്ടെത്തിയതോടെയാണ് മരണത്തിൽ ദുരൂഹത ഉയർന്നത്. മകൻ അഹമ്മദ് മുസമ്മിലാണ് പരാതിയുമായി പോലീസിനെ സമീപിച്ചത്. പോസ്റ്റ് മോർട്ടത്തിലൂടെ മരണകാരണം കണ്ടെത്താനാകുമെന്ന പ്രതീക്ഷയിലാണ് അബ്ദുൽ ഗഫൂറിന്റെ കുടുംബം. ഇതിനിടിയിൽ സ്വർണ്ണാഭരണങ്ങൾ കാണാതായതുമായി ബന്ധപ്പെട്ട് നിരവധി തട്ടിപ്പു കേസിൽ ആരോപണ വിധേയയായ ഉദുമ മാങ്ങാട്ടെ വ്യാജ മന്ത്രവാദിനിക്കെതിരെയും പോലീസ് അന്വേഷണം നടക്കുന്നുണ്ട്

കാസറഗോഡ് ജില്ലാ ആശുപത്രിയിൽ കൂടുതൽ ഓപ്പറേഷൻ തിയേറ്ററുകൾ, ലിഫ്റ്റ്, കുട്ടികളുടെ ഒപി താഴെ നിലയിലേക്ക് മാറ്റൽ തുടങ്ങിയ ഒരുപിടി ആവശ്യങ്ങളും പരാതികളുമായി നിവേദനം നൽകി.

കാസറഗോഡ് ജില്ലാ ആശുപത്രിയിൽ ഒരൊറ്റ ഓപ്പറേഷൻ തിയേറ്റർ മാത്രമേ ഉള്ളൂ വെന്നും സകലമാന ഓപ്പറേഷനുകളും ഒരേ തിയേറ്ററിൽ ആണ് നടത്തപ്പെടുകയെന്നും ഓപ്പറേഷനുകളുടെ എണ്ണം വളരെ കൂടുതൽ ആവുമ്പോൾ സമയവും സൗകര്യവും ഇല്ലാത്തത് കാരണം ഓപ്പറേഷൻ നിശ്ചയിച്ചവർക്ക് ഡേറ്റ് കൊടുത്ത് വീട്ടിലേക്ക് തിരിച്ചയക്കുകയാണ് ചെയ്യുന്നതെന്നും എയിംസ് കൂട്ടായ്മ പരാതിപ്പെട്ടു.

ഓർത്തോ വിഭാഗത്തിന് ആഴ്ചയിൽ രണ്ട് ദിവസമാണ് ഓപ്പറേഷൻ നിശ്ചയിച്ചിട്ടുള്ളതെന്നും ഈ രണ്ട് ദിവസങ്ങളിൽ പരമാവധി 10 ഓപ്പറേഷനുകൾ നടത്തുകയും ബാക്കിയുള്ളവർക്ക് ഡേറ്റും കാത്ത് മാസങ്ങളോളം കാത്തിരിക്കേണ്ടതായ ദുരവസ്ഥ ആണ് നില നിൽക്കുന്നതെന്നും ഈ അവസ്ഥ മാറ്റാൻ കൂടുതൽ ഓപ്പറേഷൻ തിയേറ്ററുകൾ അനുവദിക്കുകയും സൗകര്യങ്ങൾ വർദ്ദിപ്പിക്കുകയും ചെയ്യുനമെന്നും ഇതിന് വേണ്ടി ഉടനടി നടപടികൾ സ്വീകരിക്കണമെന്നും വകുപ്പ് മന്ത്രിയോട് ആവശ്യപ്പെട്ടു.

‘കാസറഗോഡ് ജില്ലാ ആശുപത്രിയിൽ ലിഫ്റ്റ് ഇല്ല. ലിഫ്റ്റിനുള്ള സ്ഥലം ഒഴിച്ചിട്ടിട്ടുണ്ട്. ലിഫ്റ്റ് സ്ഥാപിച്ചിട്ടില്ല. ഉടനടി ലിഫ്റ്റ് സ്ഥാപിക്കാനുള്ള ഉത്തരവ് നൽകേണ്ടതുണ്ട്.

കുട്ടികളുടെ ഒപി ചുട്ടുപൊള്ളുന്ന ആസ്ബറ്റോസ് ഷീറ്റിന് കീഴിൽ മൂന്നാം നിലയിലാണ്. എൻഡോസൾഫാൻ മൂലവും അല്ലാതെയും അവശരായ അമ്മമാർ എൻഡോസൾഫാൻ ദുരിതരായ കുട്ടികളെയും ഒക്കത്തിരുത്തി മൂന്നാം നിലയിലേക്ക് കയറിപ്പോകണം. ചൂട് കൊള്ളണം. ലാബ് ടെസ്റ്റിനായി ലാബിലേക്ക് താഴ്പ്പോട്ട് ഇറങ്ങണം. വീണ്ടും മുകളിലോട്ട് റിപ്പോർട്ടുമായി പോവണം. ഇതെന്തൊരു കണ്ണിച്ചോര ഇല്ലാത്ത ഏർപ്പാട് ആണ് വകുപ്പ് മന്ത്രിയേ… നിങ്ങളും ഒരു സ്ത്രീ അല്ലേ…? ഒരു അമ്മ അല്ലേ…? മാറ്റണം., കുട്ടികളുടെ ഒപി താഴെ നിലയിലേക്ക് മാറ്റണം. അതിന് (മാറ്റലിന്) ഒരൊറ്റ മണിക്കൂറിന്റെ സർക്കാർ ഉത്തരവ് നടപടി ക്രമങ്ങളും ഇപ്പോൾ തന്നെ ഉണ്ടാവണം.’ നിവേദനത്തിലൂടെ ആവശ്യപ്പെട്ടു.

കാസറഗോഡ് ജില്ലാ ആശുപത്രിയിൽ കൂടുതൽ ഓപ്പറേഷൻ തിയേറ്ററുകൾ, ലിഫ്റ്റ്, കുട്ടികളുടെ ഒപി താഴെ നിലയിലേക്ക് മാറ്റൽ എന്നിവ നടപ്പിലാക്കുന്നതിന് കേരള സർക്കാർ അടിയന്തിര പ്രാധാന്യത്തോടെ പുതിയ നടപടികൾ സ്വീകരിക്കണമെന്നും യുദ്ധകാല അടിസ്ഥാനത്തിൽ ഭരണ-സാമ്പത്തിക അനുമതികൾ ബഹുമാനപ്പെട്ട വകുപ്പ് മന്ത്രിയും മന്ത്രിസഭയും പാവപ്പെട്ട ജനങ്ങൾക്ക് ലഭ്യമാക്കണമെന്നും ആരോഗ്യ മേഖലയിൽ ജില്ലയുടെ പിന്നോക്കാവസ്ഥക്ക് പരിഹാരം ഉണ്ടാവണമെന്നും എയിംസിന് വേണ്ടി കാസറഗോഡ് ജില്ലയിൽ ഭൂമി അനുവദിക്കണമെന്നും എയിംസ് കാസറഗോഡ് ജനകീയ കൂട്ടായ്മയ്‌ക്ക് വേണ്ടി വൈസ് പ്രസിഡന്റുമാരായ ജമീല അഹമ്മദ്‌, ഫൈസൽ ചേരക്കാടത്ത്, ട്രഷറർ സലീം സന്ദേശം എന്നിവർ നേരിട്ട് നൽകിയ നിവേദനത്തിലൂടെ ആവശ്യപ്പെട്ടു.